Sashe 83

Fuskarsa ba yabo ba fallasa suka gaisa da Addah, ba tareda ya ko kalli inda Dada take ba ya kira Naziru daya kafe a guri daya kaman gunki yace ya kaishi waje.

A qofar gidan kuwa bayan Naziru ya ajiye a gurin da yake zama suyi hira da mutanen sa se ya kalli Nazirun yana murmushi yace

"Kaji abinda uwarku da yar uwarta suka aikata ko? Ni sam ba wannan Nafisan na aura ba ban kuma san lokacin data zama me son kanta da son zuciya irin haka ba. Amma shikenan, suma ai sun haifa".

"Kayi haquri Baba" Naziru ya fada,
"Kai zan bawa haquri ai Naziru ku da Allah ya jarraba da uwa mara tunani, kuyita Addu'a Allah ya tsare ku da fadawa hali irin wanda dan uwanku yake ciki dukda shi da kansa ya jefa kansa ba wani ya aike shi ba, idan kuwa harta tabbata Bashir ya rabu da yarinyar nan, hmmm Allah dai ya rufa asiri" Baba ya fada yana zaro kudi a aljihunsa ya miqawa Naziru yace

"Karbomin katin Mtn na kirashi naji, wayata babu kudi".
"Bari na tura maka ta Banki Baba" Naziru ya fada sannan yayi masa transfer katin ya danna wayar Bashir.

BASHIR
Se da gabansa ya fadi da yaga kiran Alhajin su dan muddin ba abu me matuqar muhimmanci ba Alhajin baya kiransa sedai shi Bashir din ya kirashi.

Yasan kiran baze rasa nasaba da maganar sa da Ma'u ba labari yaje musu kuma wannan yarinyar ce zata fada dan se daga baya ma ya shiga dana sanin me yasa ya gaya mata? Dukda ko ba yanzu ba ai dole zasuji amma qila se kafin sannan ya gama daidaita komai.

Be daga ba seda wayar ta katse yabi bayan kiran a ransa yana shirya abinda ze fada masa.

"Barka da Rana Baba" Bashir ya fada bayan da Alhajin ya daga wayar, se ya mayar masa da cewa

"Barka dai Muhammadu ya aikin ya iyali?"
"Duk suna lafiya Baba, muna cikin aiki ne ma yanzu idan ba damuwa zuwa anjima idan muka fita sallah sena kira" Bashir ya fada yana goge zufar da tafin hannunsa yayi a jikin rigarsa, Allah yasa ba wannan maganar Baban ya bugo suyi ba dan besan me zece masa ba

"Ai maganar tawa gajeriya ce tambaya daya ce zan maka seka ci gaba da aikinka, shin dagaske ne ka saki Asma'u?" Maganar Baban tayi masa dirar mikiya nan da nan ya fara in ina kamar wani sabon kurma duk yabi ya rude, dakatar dashi Baban yayi da cewa

"Nutsu mana Malam Bashari tambaya ce fa me amsa da Eh ko Aa amma duk ka rikice kamar wanda Alqali ya titsiye, kaga aiki kakeyi ka amsamin na kashe wayata shikenan".

Yanda yayi maganar a dake ya tabbatar wa da Bashir ba a cikin lokacin wasa yake ba, dan haka dole ya kama kansa kamar qaramin yaro yace

"Eh Amma..."

"Riqe bayaninka ai ka amsamin, yanzu dai ina so naji ka tuna rabar daka zo mun da zancen zaka auri yar gurin Fattu abinda na gaya maka?"

Shiru Bashir yayi ya rasa ma wani abu ne ya dabaibayeshi,

"Dakai nake magana kayi shiru fa Bashir" Baban ya daka masa tsawar data sakashi magana babu shiri yace

"Na tuna Baba"
"Me nace maka?"
"Ka tambayeni dole akayi mun nace maka Aa ra'ayin kaina ne, sannan ka sake tambayata me Asma'u tayi mun nace maka babu komai"
"Daga nan kuma fa?"

"Ka gayamun cewa Asma'u matar rufin Asirice kuma mayafi ce data lullube ni, idan kishiya zan yi mata naje na nemo yar gidan mutunchi wadda tasan qimar kanta na hadasu amma na kafe nace ni Amirah nake so".

"Ba shakka kafiya tayi amfani. Tun ba'aje ko ina ba ta rabaka da uwar gidanka uwar yayanka shida ko, to ka dai bi a sannu Bashir idan bakayi sa'a ba duniya da kanta zata koya maka karatun da ka kasa ganewa, seka zubda hawaye a lokacin da babu amfanin da zasuyi maka, ita matar fari komai mugun halin ta tana cin wannan darajar ta kasancewarta tushiya bare kai da Allah ya datar dakai da samu mace ta gari yar gidan mutunchi shine kaga ta wannan hanyar zaka gode masa ba madallah, gaka ga Fattu nan da yarta sun isheka bada misali a gaba" yana gama fadar haka ya kashe wayarsa.

Sosai yake jin baqin ciki da takaicin abinda Bashir ya aikata, me yasa tun a lokacin da Asma'u ta nuna bazata zauna dashi ba be goya mata baya ta barshi tun a sannan ba? Daya san haka zata faru a gaba da koda qarfin tuwa se Bashir ya bata takardarta a lokacin da ita da kanta ta buqata amma ba'a tara sani da ikon Allah, shi yanzu da wane ido ze kalli yarinyar da Ahalinta.

Wayarsa ya shiga lalubawa ya shiga neman Number Alhaji Qarami dan a yanzu shine matsayin uban Asma'u, cikin Sa'a ya samita kuwa ya dannan masa kira.

Cikin mutun taka suka gaisa kafin suka shiga jimamin abinda ya faru kafin yace ya turo masa da Number Goggo ze kirata da kansa tunda Alhajin yace bata sani ba.

Suna gama wayar kuwa ya tura masa dan shikansa yana ta taraddadin ta yanda ze sanar mata da wannan labari a irin yanda ta daukaki Bashir kamar dan data haifa.

Cikin sa'a Alhaji Amadu yana kiran Goggo ta daga wayar, bata da lambar ya sani dan haka yayi mata bayanin shine nan suka sake gaisawa tana tambayarsa jiki da su Dada ya amsa da duka lafiya kafin suka yi shiru.

"Hajia abu ne mara dadi ya faru amma ina so dukka muyarda da komai muka gani a rayuwa muqaddari ne daga ubangiji ya na yin abinda yaso a kuma sanda yaso" Alhaji Amadu ya fada bayan daya katse masu shirun.

Goggo cikin rashin fahimtar inda zancen sa ya dosa dukda tasan dai baze wuce akan Asma'u ba dan haka tace masa

"Amma Alhaji meya faru ne ban gane maganar da kake yi ba".

"Kiyi haquri Hajia kuma ki fahimceni, magana ce akan Asma'u da Bashir, kinsan da aure da mutuwa da haihuwa lokaci ne dasu kuma idan Allah ya saukar dasu babu wani abu da ya isa ya canza faruwar hakan to a wannan gabar ma Allah ya saukar da ikonsa ya kawo qashen wa'adin zama tsakanin Asma'u da Bashir".

Salati Goggo ta kwaso ta dire, cike da jimami tace "Yanzu yarinyar nan seda ta kashe auran hankalin ta ya kwanta wai me Asma'u take nema ne a rayuwa? Yarinya ace zuciyarta babu salama shekaru kusan uku da yin abun nan na zata ta haqura komai ya wuce ashe ita akwai abinda take qulla kai Jama'a wadannan yara namu Allah dai kayi musu Albarka".

"Sam wallahi Hajia ba laifin Asma'u bane, bama tun yanzu ba tun tuni duk abinda ya faru ita akayiwa laifi kuma aka danneta aka sakata yin biyayyar dole saboda ita an isa da ita.

Shi Bashir din ne dai daman gaban kansa yake yi a komai to yanzu ma ya sake nuna mana ya isa da kansa ya isa yanke hukunci babu shawarar kowa yayi saki ba tareda sanin mu ba be kuma gaya mun ba se matar sa ya gayawa yanzu na tsinci zancen a bakin yar uwar tasa na kirashi kuma a waya ya tabbatar mun da haka akayi,

Dan girman Allah kiyi haquri, munyi magana da Alhaji Tukur yace mun baki sani ba saboda sun rasa ta yanda zasu gaya miki wannan al'amari shiyasa nace ni bari na kiraki da kaina na sanar dake Bashir be kyauta mana ba be kuma kyuatawa kansa ba.

Idan Bashir yana da hankali ko dan irin qaunar da kika nuna masa kika fifita farincikin sa akan na yar da kika haifa wallahi ko zaginsa Asma'u takeyi yaci ace taci wannan darajar ya daga mata qafa ballantana na tabbatar da ko kallon banza bazatayi masa ba".

"Karka yi saurin yanke hukunci cewa laifinsa ne Alhaji ita kanta Ma'u yarinya ce me naci da kafiya, wanda yake zaune da ita ne kadai yake gane halin ta tsakanin mace da mijinta kuma se Allah, Allah kadai yasan irin quntatawa da baqin halin da take masa" Goggo ta katse shi a sanyaye dan abin ya dake ta kwarai, Me Ma'u tayi wa Bashir har haka da yayi zafi ya sake ta.

"Allah yasa hakan shi yafi Alkahiri" Goggo ta fada bayan dogon ban haquri da Alhajin ya sake yi mata, haka suka ajiye waya jikinta gaba daya ya mutu,

"Allah sarki Ma'u ita kuma tata Jarabawar kenan akan abinda take so".

Alhaji Amadu kuwa bayan ya gama wayar sa yasa wani saurayi Abokin Naziru da ya zo wucewa ya turashi zuwa cikin gida, har sannan suna zaune a tsakar gidan Addah na zuba masifa da besan ko akan me takeyi ba, haka ya gungura kekensa ya shige daki ko a fuska be nuna musu yasan me akayi ba ya kuma qudurce baze taba yiwa Nafi maganar ba koda kuwa ita ta kawo kanta da kanta, ze ci gaba da Addu'a Allah ya raya shi ya kai lokacin da zasu girbi abinda suka shuka, a rabar ne ze silleta tas ya yada mata da maganganun da suka dade suna ci masa zuciya.

BASHIR
Suna ajiye waya da gaba daya ji yayi rasa me yake yi masa dadi a rayuwa. Har a yanzu shi bega abinda yayi ba ya kuma san babu me fahimtarsa adan an tashi kowa bayan Ma'u zebi baza'a duba martabarsa ta matsayin mijinta da ita take takewa ba.

Babu abinda yafi daga masa hankali da a kullum Alhaji yake maimaita masa watarana se yayi kuka da idonsa akan Amirah wannan ai baki yake yi masa kawai kuma ita Amiran nan fa ba irin wadda ya sani a baya bace yanzu ta chanza ta gyara duk wasu halayenta marasa kyau da ake gani a baya ita kuma Ma'un da akewa kallon ta kirki yanzu ita ce take masa abinda baya so.

koma dai menene aikin gama ya gama saki dai ya rigada ya furta dukda yanzu dai yaga yayi zari da yayi mata saki har biyu dan daya ya kamata yayi na gargadi amma dai ba matsala,