Sashe 6

kamar an watsa yakuwa a cikin teku, suka sake
tasowa juna a guje suka yi suka yiwa juna karo
kamar raguna suka yi baya taga-taga.
Wajen da suka yi gware take ya fashe jini
ya soma zuba boka sharbanga ya miqa hannunsa
sama take wata takobi ta bayyana ya yi xauki akan
bokanya Namsu kafin ya qarasa gareta itama ta
miqa hannu cikin iska, lokaci guda wata takobi ta
bayyana a hannunta itama tayi xauki kansa suka yi
wata gamuwa mai muni suka soma kaiwa junansu
sara da suka ko wanne yana qoqarin farauce
rayuwar xan uwansa duk wanda ya sari wani a
cikinsu sai dai kaji kamar wani qarfe da qarfe ne
suka gamu a waje guda.
Haka suka tafiyar da tsawon lokaci suna
faman fafatawa a tsakaninsu ba tare da wani a
cikinsu ya sami nasara akan xan uwansa ba, can
suna cikin wannan gumurzun sai Boka sharbanga
ya faki numfashin bokanya Namsu ya zaro wata
farar hoda daga cikin jakarsa ta bokanci ya watsa
mata.
Hodar tana sauka a jikinta nan take ta soma
jin jikinta duk ya saki, ta saki makamin da yake
hannunta sannan lokaci guda ta zube a qasa, ya

dubeta a wulaqance sannan ya qyalqyale da
dariya.
“Wanda ya fiki himma ya riga ya sha kanki,
don haka yanzunnan zan halaka ki”. Yana gama
maganar shi ya buxe jakar bokancinsa ya xauko
wata wuqa da aka yi da qashin haqarqarin mutum
ua xago da idanunshi ya kalleta gami da
qyaqyacewa da dariya kafin ya sake cewa da ita.
“Duk duniya babu wani mai sihiri da
wannan wuqar ba zata huda shi ba, don haka
yanzunnan zan halakar da ruhinki, ki zamto
tamkar ba a tava yinki na doron qasa ba” Yana
gama maganar tashi lokaci xaya ya xaga wuqar a
sama ya dubi qirjinta daidai inda zai luma wuqar
sannan yace mata.
“Sai wata rana ABOKIYAR GABATA,
Bokanya Namsu” Yana gama maganar ya nufi
qirjinta cikin sauri da zumar soka wuqar a gaban
qirjinta.
**
Sarauniyar aljanun cikin ruwa ta wanzu
tsawon lokaci tana tafiya babu qaqautawa ita da
kanta tana da masaniyar duk duniya babu wani
mahaluki da yake da gaggawar da zai iya biyo
bayanta har ya cimmata don haka ganin ta yi nisa

da wurin su bawa Farsu sai ta rage gaggawar da
take yi ta samu wuri ta tsaya.
A hankali ta miqa hannunta ta shafi
wuyanta cike da takaici da baqin ciki domin rasa
sarqarta da ta yi. Duk duniya babu abinda tafi
qauna a rayuwarta kamar sarqa domin duk wani
sirri nata ya ta’allaqa a jikinta. Duk abubuwan duk
abubuwan ba su ne vacin ranta ba, babban vacin
ranta na rashin samun damar buxe jakar da ta saka
ruhin sarkin aljanu Gamsu wanda dole sai ta yi
amfani da sarqa ta zata buxe jakar. Wannan abun
shi ne abu mai muni da sarauniyar aljanun cikin
ruwa ta tava cin karo da shi a tsawon shekarunta
da ta yi a duniya.
Ta xaga kanta sama ta soma qoqarin tunani
da zumar ta tunano hanyar da zata bi domin ganin
ta samo mafita akan abinda ya dameta.
Abubuwa da yawa suka yi ta zuwar mata
cikin ranta, amma duk ba su haska mata tunanin
yadda zata dawo da sarqarta ba. Haka sa’o’i masu
dama suka wuce tana faman tunane-tunane bayan
tsawon lokaci wata dabara ta faxo mata, wannan
dabarar ba qaramun faranta mata rai tayi ba,
domin ta yi imani itace hanya guda da zata dawo
da sarqarta gareta cikin ruwan sanyi.

Don haka cikin gaggawa ta miqe tsaye ta
lalubi gefen qungunta ta xauko wani madubin tsafi
ta dubi kanta a ciki ta yi murmushi sannu a hankali
ta soma karanto wasu xalasimai na tsafi tana
duban kanta a jikin madubin, bata xauki wani
lokaci a haka ba take kamaninta suka soma juyewa
zuwa na bil’adama.
A hankali ta juya kama zuwa ga surar mace
baqar fata mai kyawun gaske, yadda duk wani
namiji idan ya kalleta sai ya yi mafarkin kyawunta,
ta dubi kanta a jikin madubin har sheqi take yi
tamkar ta shafa shuni a jikin fatarta, ga manyan
fararen idanu da jan shacin bakinta tayi wa kanta
tattausan murmushi a hankali tace.
“Wannan surar Gimbiya Zailu na aro, duk
duniyar baqaqe babu mai kyawunta zan yaudari
baqar fatar nan na amshi sarqata daga hannunsa
kafin na halakar da ruhinsa ya zamto na shafe shi
daga doron qasa” Ta qarasa magana tana
qyaqyacewa da dariya kafin lokaci guda ta nufi
wajen teku ta wajen da tana da tabbacin tanan su
Bawa Farsu za su fito.
Iska teku ta ci gaba da kaxawa a hankali.
**

Tsawon lokaci suka xauka a tsaye a wurin
bawa farsu yana kallonsu yana yi musu dariya.
Kafin ya miqa hannu ya xauki sadauki Ansar ya
mayar da shi can wani wuri yua ajiye shi, ya
xauko wasu sassa na gawarwaki halittun da suka
yi yaqi da su ya xoxxora masa a jikinsa. Ya dawo
itama Gimbiya Lusa ya zuba mata idanu yana
kallonta ya qare mata kallo a hankali.
Ban tava tsayawa na qare miki kallo ba sai
yau, ashe daman haka kike da tsantsar kyau, ya
saurara yana dubanta ya dubi idanunta da suke a
buxe manya da su, farare qal. “Tunda nake a
rayuwata ban tava ganin kyawawan qwayar
idanuwa kamar naki ba, surarki zata xauki
hankalin sarakuna da attajirai ma su ji da kansu”
Ya kammala maganar yana dubanta. Ya juya ga
sadauki Ansar yace masa “Ka koma yadda kake”
Yana faxar haka sai sadauki Ansar ya ci
gaba da motsi kamar yadda ya ke a baya, ya tsaya
yana duban kansa cike da mamaki ya mayar da
kallonsa ga Bawa Farsu yaga yadda ya tsaya a
gaban Gimbiya Lusa cikin tsawa yace masa.
“Meye haka? Maza ka matsa daga wajenta”
Ya juyo yana dubansa fuskarsa xauke da
murmushi.

“Kana da alaqa da ita ne?” Ya jefa masa
tambayar sadauki Ansar shima ya tsare sa da ido.
“Wanne sihiri ka samo kake aikatawa a
gare mu, don haka ina mai sanar maka lallai kayi
gaggawar rabuwa da shi, idan kuma ba haka ba
zan amshe shi da qarfin tsiya na lalatashi”
Kalamansa ya baiwa bawa Farsu dariya ya
fuskance shi sosai sannan yace masa.
“Bana jin akwai wani sadauki da zai iya
amsar wannan abun daga hannuna da zunzurutun
jarumtaka don haka idan kana ganin cewar za ka
iya to ga fili ga mai doki, daga ni sai kai sai kuma
Gimbiya Lusa” Ya gama maganar yana mai
dubanta “Ci gaba da rayuwarki” yana rufe bakinsa
itama ta dawo yadda take ta dubi kanta cike da
mamaki, ta mayar da kallonta ga sadauki Ansar
cikin mamaki ta tambaye shi.
“Kaima abinda ya faru da ni ya sameka?”
ya gyaxa kai.
“Ga wanda ya aikata mana sihirin tsafi,
kuma yanzu nan zan ladaftar da shi akan wannan
laifin daya aikata mana. Domin zan amshi sihirin
na lalata shi”.
Gimbiya Lusa ta juya ta dubi Bawa Farsu a
fusace tace masa gwara tun cikin ruwan sanyi ka

bamu sihirin da ka aikata akanmu mu lalatashi
domin idan ba haka ba zamu amshe shi da qarfin
tsiya, sannan mu mayar da shi kanka” Bawa farsu
ya dubeta ya yi murmushi kafin yace mata.
“Ba irin mu ake yiwa barazana ba domin
mun sha jarumtaka a nono, mun zama dutsen dake
cikin ruwa bamu san ana rana ba. Saboda haka duk
wanda yake ganin zai iya amsa da qarfin damtse to
ga fili ga mai doki” Ya gama magana yana
dubansu.
Sadauki Anwar ya miqa hannunsa ya zaro
takubinsa ya riqeta sosai a hannunsa ya dubi Bawa
Farsu ganin haka shima ya zare nasa makamin ya
dubi sadauki Anwar suka fuskanci juna ko wanne
a cikinsu yana jujjuya makaminsa. Tsawon lokaci
suna tsaye carko-carko kamar zakaru kafin daga
bisani Anwar ya yi xauki ga bawa Farsu da zumar
ya yi tafiyar guguwa da shi,ganin tahowarsa ya
saka shima bawa Farsu ya tare shi suka yi wata
qazamar gamuwa data girgiza qasan tekun,
makamansu suka bayar da wata maxaukakiyar
qara, su ka yi zamiya suka kuma juyowa suka
gauraya suka soma musayar sara da suka a
tsakaninsu.

A haka suka xauki tsawon lokaci suna
faman fafatawa bayan tsawon wani lokaci sannan
bawa Farsu ya sauya salon yaqinsa nan take ya
takura Sadauki Ansar duk da irin tsananin jarumtar
da yake da ita. Wannan shi ne salon yaqi xaya da
aka tava sauya masa a tsawon rayuwarshi ta
duniya bai san ta yadda zai qare kanshi ba a ‘yan
lokuta kaxan bawa Farsu ya gajiyar da shi ainun!
Ganin abinda yake shirin faruwa ya sa Gimbiya
Lusa itama ta zare makaminta ta yi xauki akansa
da wata irin zuciya mai kama da dutse, jin
motsinta ya saka ya yi saurin juyawa tana zuwa ta
kai masa wani sara a kaikace cikin zafin nama ya
kaucewa saran, nan suka soma kai sara da suka ya
zamana su biyu wato Gimbiya Lusa da sadauki
Ansar sun rufarwa Bawa Farsu a tsakiya.
Qura ta turniqe a wurin babu abunda zaka
dunga juyowa sai qarar haxuwar makamansu da
gilmawar kai sara da suka a tsakaninsu walqiya da
motsin wucewar makamansu ya karaxe ilahirin
wurin. Kai komo da sintiri suka rika yi a wajen ko
wanne a cikinsu yana burin ganin ya samu galaba
akan xan uwansa. Su Gimbiya Lusa suka kasa
samun nasara akan Bawa Farsu haka shima ya
kasa samun nasara akan su, har suka gaji dukansu